Бугунги кунда юртимизда амалга оширилаётган кенг миқёсдаги ислоҳотлар жараёнида коррупция мамлакатнинг ижтимоий-иқтисодий ва ҳуқуқий-сиёсий ривожланишига жиддий таҳдид солувчи хавф-хатарлардан бири деб қўрилмоқда.

Савдо-саноат палатаси томонидан ўз мақсад ва вазифаларини бажариш доирасида тадбиркорларнинг ҳуқуқий саводхонлиги ва маданиятини ошириш, коррупцияга нисбатан муросасиз муносабатни тўлиқ шакллантириш юзасидан турли йўналишларда доимий равишда қатор ишлар амалга оширилиб келинмоқда.

Жорий йилнинг 13 июн санасида «Radisson Blue Tashkent» меҳмонхонасида Ўзбекистон Республикаси Савдо-саноат палатаси Бош прокуратура ва Европа хавфсизлик ва ҳамкорлик ташкилоти (ЕХҲТ) ўзаро ҳамкорликда «Ўзбекистон хусусий секторида коррупцияга қарши курашишга кўмаклашиш» лойиҳасини амалга ошириш бўйича ахборот семинари ўтказилди.

Тадбирда халқаро ташкилотлар вакиллари, шунингдек, вазирлик ва идоралар, тадбиркорлик субъектлари, фуқаролик жамияти ва оммавий ахборот воситалари вакиллари иштирок этдилар, жумладан Ўзбекистон Республикаси Савдо-саноат палатасидан Суд, ҳуқуқни муҳофаза қилувчи ва назорат қилувчи органлар билан ҳамкорлик қилиш бошқармаси бошлиғи Б.Ибодуллаев, ЕХҲТнинг Ўзбекистондаги лойиҳалари Координатори маслахатчиси Ханс Ульрих, ЕХҲТ ва Европа Кенгаши эксперти Стрелнечок Ярослав, ЕХҲТнинг миллий менежери М.Хусанов, Бош прокуратуранинг Тадбиркорлик субъектлари ва инвестицияларни ҳуқуқий ҳимоя қилиш бошкармаси бошлиғи А.Эшбеков йиғилиш мавзуси бўйича ўз тақдимотлари билан минбарга чиқдилар.

Савдо-саноат палатаси масъул ходими Б.Ибодуллаев ўз тақдимотида “Коррупцияга қарши курашиш тўғрисида”ги Қонуни ижросини таъминлаш борасида Палата томонидан, иқтисодиётнинг бошқа жабҳалари қаторида тадбиркорлик соҳасида коррупциявий кўринишлари ўз вақтида аниқлаш, уларни бартараф этиш ва олдини олиш йўналишида олиб борилаётган чора-тадбирлар ҳақида сўз юритди, жумладан, тадбиркорлик соҳасида аниқланган маъмурий ва бюрократик тўсиқлар бартараф этилмоқда, рўйхатга олиш, рухсат этиш ва лицензияга доир тартиб-таомиллар соддалаштирилмоқда, тадбиркорлик субъектлари фаолиятини текшириш тизими такомиллаштирилмоқда. Бу йўналишда текширувлар икки йилга  тўхтатилди, шунингдек тадбиркорлик фаолиятини олиб боришда барча бизнес қатнашчилари учун тенг шарт-шароитлар яратилиши ва инсофсиз рақобатга йўл қўймаслик чоралари кўрилмоқда.

Мазкур лойиҳани амалга оширишдан кўзда тутилган асосий мақсад республикада тадбиркорликнинг ривожланишига тўсқинлик қилаётган коррупцияга қарши курашиш амалиётига халқаро тажрибани жорий қилиш, давлат ва бизнеснинг барча жабхаларида коррупциянинг олдини олиш соҳасида миллий қонунчилик қоидаларини самарали қўллаш, шунингдек хорижий инвестицияларни жалб этиш учун янада соғлом инвестиция муҳитини яратиш мақсадида соғлом рақобат муҳитини рағбатлантиришдан иборат.

Қайд этиш лозим, Ўзбекистон Республикаси Президенти Ш.М.Мирзиёевнинг ташаббуслари асосида мамлакатда демократик ҳуқуқий давлат ва кучли фуқаролик жамияти қуриш стратегияси доирасида қонун устуворлигини таъминлаш, фуқароларнинг ҳуқуқ ва қонуний манфаатларини ҳимоя қилиш, суд-ҳуқуқ тизимини ислоҳ қилиш юзасидан бир қатор тизимли тадбирлар амалга оширилиб келинмоқда.

Зеро, давлатимиз раҳбари таъкидлаганларидек, коррупция ва уюшган жиноятчиликка қарши курашиш, шунингдек, ҳуқуқбузарликларнинг олдини олиш масалаларини самарали ечиш устувор вазифаларимиздан бири бўлиб қолади.

Манба: Ўзбекистон Республикаси Савдо саноат палатаси