Кўриниш
Шрифт ўлчами
?
Экран сухандони
Ишлаб чиқилган: 
Ўзбекистон Республикаси
Ҳукумат портали
Мангу барҳаёт сиймо
2018-04-09 | Жамият
Қашқадарё вилоятида ҳам буюк жаҳонгир, Соҳибқирон Амир Темур таваллудининг 682 йиллиги кенг нишонланмоқда.
Шаҳрисабз шаҳри марказидаги Амир Темур хиёбонида ўтказилган тадбир аввалида буюк бобокалонимиз ҳайкали пойига гулчамбарлар қўйилди. Тадбирда сўз олганлар улуғ аждодимизнинг шонли ҳаёти, мустаҳкам марказлашган давлат тузиш йўлида олиб борган курашлари, у юритган оқилона сиёсат ҳақида тўхталиб, Соҳибқирон Амир Темур ўз даврида нафақат қудратли давлат асосчиси, балки илм-фан, маданият ва маънавият ҳомийси, жаҳон тамаддуни ривожига улкан ҳисса қўшган буюк шахс эканини таъкидладилар. Буюк аждодимиз қолдирган бой меросни ўрганиш, тарғиб қилиш, айниқса, ёшлар қалбига ул зотнинг ҳаётий ўгитларини сингдиришга алоҳида эътибор қаратилмоқда.
– Бир пайтлар бу хиёбон жуда кўримсиз, тепаликлардан иборат ташландиқ жой эди, – дейди шаҳрисабзлик фахрий Раҳматулло Умаров. – Яратганга шукр, бугун бу жойни танимайсиз. Хиёбонда кенг кўламли бунёдкорлик ишлари амалга оширилиб, шаҳарликлар ва меҳмонлар сайр қиладиган кўркам масканга айланиб бормоқда. Туризм ривожланиб, худди темурийлар даврида бўлгани каби сайёҳлар оқими кўпаймоқда.
Давлат ва жамоат ташкилотлари вакиллари, адиблар, олимлар, фахрийлар, талаба ёшлар иштирок этган тадбирда Амир Темур руҳини хотирлаб Дор ут-тиловат мажмуасида қуръон тиловат қилинди ва эҳсон оши тарқатилди.
Ўлмас Баротов, Жамшид Норқобилов (сурат) ЎзА
Манба: ЎзА
