– Ўзининг кўрсатувлари билан эшиттиришларини дунёнинг 40 дан ортиқ тилларида олиб борадиган Би-Би-Си телерадио корпорацияси глобал иқлим ўзгариши ва экологик муаммоларнинг оқибатларини бартараф этиш бўйича қатор қисқа метражли фильмларни суратга олиш ишларини бошлади, – дейди журналист-продюсер Рустам Қобил. – Бунинг учун ушбу муаммоларни бартараф этишда сўнгги йилларда яхши натижаларга эришаётган дунёнинг 10 давлати, шулар қаторида Ўзбекистон ҳам танлаб олинди. Фильмни суратга олишдан мақсадимиз Ўзбекистон Республикаси Президенти Шавкат Мирзиёев раҳбарлигида Орол инқирозининг оқибатларини бартараф этиш, экологик ҳудудда яшаётган аҳолининг турмуш даражасини яхшилаш бўйича олиб борилаётган кенг кўламли ишларни дунё жамоатчилигининг эътиборига ҳавола этиш бўлиб ҳисобланади. 

– Ўзбекистонда, шу жумладан, Қорақалпоғистонда биринчи маротаба бўлишим, – дейди видеопродюсер Пол Харрис. – Суратга олиш жараёнининг совуқ кунларга тўғри келиши бироз муаммолар пайдо қилди. Шундай бўлишига қарамасдан, халқингизнинг меҳмондўстлиги, маданияти билан миллий урф-одатлари менда алоҳида таассурот қолдирди. Ўзбекистонда амалга оширилаётган кенг кўламли ислоҳотлар жаҳон ҳамжамиятининг қизиқишини оширмоқда. Келажакда ушбу муваффақиятлар ҳақида фильм олишни мақсад қилганмиз. Вақтнинг тиғизлигидан Қорақалпоғистон, унинг пойтахти Нукус шаҳридаги қурилиш ва ободонлаштириш ишлари билан тўлиқ танишиш имкони бўлмади. Лекин, дунёга машҳур И.В.Савицкий номидаги санъат музейи экспонатларини томоша қилганимдан хурсандман. 

Би-Би-Си телерадио корпорациясининг жаҳон хизмати ижодий жамоаси томонидан суратга олинган ушбу фильм яқин кунларда намойиш этилади.