Ўзбекистон Савдо-саноат палатасида Озарбайжон ва маҳаллий тадбиркорлар иштирокида бизнес-форум бўлиб ўтди.

Тадбирда 20 дан ортиқ озарбайжонлик йирик компания вакиллари иштирок этди. 

Ўзбекистонда Озарбайжон Республикаси сармояси иштирокида 84 корхона фаолият юритади. Озарбайжонда эса Ўзбекистоннинг 2 корхонаси ташкил этилган. Булар "Ўзбекистон ҳаво йўллари" МАК ва "Ўзавтосаноат" дилерлик марказидир. 

Бизнес-форум доирасида Ўзбекистон Савдо-саноат палатаси ва Озарбайжон Республикаси тадбиркорлар миллий конфедерацияси ўртасида ҳамкорлик битими имзоланди. 

Шундан сўнг Ўзбекистон Савдо-саноат палатаси раиси А.Икрамов ва Озарбайжон Республикаси тадбиркорлар миллий конфедерацияси президенти Мамед Мусаев иштирокида матбуот анжумани ташкил этилди. 

Унда икки мамлакат ишбилармонлари ҳамкорликдан бирдек манфаатдор экани таъкидланди. 

Улугбек Асроров, ЎзА

Манба: ЎзА