Наманганда солиқ қонунчилигидаги янгиликларни жамоатчиликка етказишда оммавий ахборот воситалари билан ҳамкорлик масалаларига бағишланган давра суҳбати бўлиб ўтди. 

– Корхонамиз момиқ сочиқлар ва трикотаж маҳсулотлари ишлаб чиқаришга ихтисослашган, – дейди “Наманган момиқ сочиқлари” масъулияти чекланган жамияти раҳбари Ғ.Бобохонов. – Фаолиятимизни 20 кишилик жамоа билан бошлаган эдик, бугун эса корхонамизда 300 га яқин ишчи меҳнат қилмоқда. Корхонамиз ривожида тадбиркорларга берилаётган кенг имкониятлар қаторида солиқ имтиёзлари ҳам муҳим аҳамият касб этмоқда. Масалан, ягона солиқ тўлови бўйича имтиёз асосида ўтган йили 5 миллиард 941 миллион сўмдан кўпроқ маблағ корхона ихтиёрида қолдирилгани биз учун жуда асқотди. Тежалган маблағни янги технологиялар харид қилишга йўналтирдик. Айни пайтда корхонамизда ишлаб чиқарилаётган 400 дан ортиқ турдаги маҳсулот билан ички бозорни таъминлашдан ташқари Россия, Қозоғистон, Молдова, Болгария, Украина, Туркманистон, Қирғизистон каби давлатларга экспорт қилмоқдамиз. Албатта, имтиёз натижасида тежаб қолинган маблағ ҳисобидан келгусида иш ўринларини янада кўпайтириш ҳаракатидамиз. 
 

Акрамжон Сатторов, ЎзА

Манба: ЎзА