Тошкент ирригация ва қишлоқ хўжалигини механизациялаш муҳандислари институти ҳузуридаги «International House – Tashkent» академик лицейида қатор новаторлик техник ишланмаларни ўз ичига олган «Smart Class» ўқув синфи очилди.

Замонавий синфнинг очилиш маросимида Ўзбекистон Республикаси Олий ва ўрта махсус таълим, Халқ таълими, Ахборот технологиялари ва коммуникацияларини ривожлантириш вазирликлари, «Huawei» компанияси вакиллари, ахборот технологиялари соҳаси мутахассислари, касб-ҳунар коллежлари ҳамда академик лицейлар ўқитувчи ва ўқувчилари иштирок этди. 

Ўзбекистон ахборот технологиялари ва коммуникацияларини ривожлантириш вазири вазифасини бажарувчи Ш.Шерматов, олий ва ўрта махсус таълим вазири И.Мажидов, халқ таълими вазири ўринбосари А.Саъдуллаев, "International House – Tashkent" академик лицейи директори А.Тиллаев ва бошқалар мамлакатимизда дунё ахборот-таълим маконига интеграциялашган, замонавий техник имкониятлардан самарали фойдаланишга йўналтирилган замонавий таълим тизими шакллантирилаётганини таъкидлади. 

«Smart Class»да қўлланилаётган технологиялар ўқитувчига ўқувчилар билан интерактив усулда боғланиш, уларга умумий ва индивидуал вазифалар бериш имконини тақдим этади. Янги «ақлли синф» ўқувчиларнинг қобилиятлари ва ижодий салоҳиятини тўлиқ рўёбга чиқаришга хизмат қилади. Педагог ўқувчилар томонидан топшириқлар қандай бажарилаётганини реал вақт тартибида бевосита кузатиб бориши мумкин. 

Синф лицей ўқитувчи ва ўқувчиларига хорижлик мутахассислар билан масофавий тарзда тажриба алмашиш имконини берувчи видеоконференция тизими билан жиҳозланган. 

Шунингдек, машғулотлар жараёнида ўқувчиларга барча зарур иловалар ўрнатилган планшетлар тақдим этиш режалаштирилмоқда.

Манба: ЎзА