Қарши ва Термиз оралиғидаги темир йўлни электрлаштириш ишлари авж палласида. Узунлиги 325 километрни ташкил этадиган мазкур йўлнинг 183 километри тўлиқ электрлаштирилди. Урганч – Хива янги темир йўли қуриш ва электрлаштириш ишлари олиб борилмоқда. 

Темир йўл вокзалларини замонавий талаблар асосида қайта қуриш, йўловчиларга халқаро талаблар даражасида хизмат кўрсатиш имконини берадиган замонавий техника ва технологиялар билан жиҳозлашга алоҳида эътибор қаратилмоқда. Ўтган даврда мамлакатимизда 16 янги темир йўл вокзали бунёд этилди, 9 вокзал реконструкция қилинди. Ҳозирги пайтда Тошкент шаҳридаги Жанубий вокзални реконструкция қилиш, Хива ва Наманган шаҳарларида замонавий вокзаллар қуриш бўйича ишлар давом этмоқда. 

Қурилиш-бунёдкорлик ишларида ҳам темирйўлчиларнинг ҳиссаси салмоқли бўлаётир. Турли мураккабликдаги йўллар, кўприклар, эстакадалар бунёд этишда катта тажриба тўплаган “Ўзбекистон темир йўллари” акциядорлик жамияти жамоаси бугун ўта мураккаб қурилиш – ер усти ва ер ости метрополитенларини барпо этишга киришган. Пойтахтимизнинг Сергели туманини шаҳар маркази билан боғлайдиган олти бекатли ер усти, Юнусобод туманида ер ости метрополитенини қуриш ишлари олиб борилмоқда. 

Анжуманда Президентимизнинг шу йил 4 августдаги “Мамлакатимиз темир йўл соҳаси ходимларидан бир гуруҳини мукофотлаш тўғрисида”ги фармонига мувофиқ бир гуруҳ темирйўлчиларга давлатимизнинг фахрий унвон, орден ва медаллари топширилди.

 

– Давлатимиз раҳбарининг фармони билан жорий йилдан бошлаб ҳар йили август ойининг биринчи якшанбаси темир йўл транспорти ходимлари куни сифатида нишонланиши бизга чексиз ғурур бахш этди, – дейди “Ўзбекистон темир йўллари” акциядорлик жамиятининг “Ўзтемирйўлмаштаъмир” унитар корхонаси бош директори, “Меҳнат шуҳрати” ордени соҳиби Нусратилло Абдуллаев. – Билдирилган юксак ишончга муносиб бўлиш, зиммамиздаги масъулиятни теран англаш, халқимиз манфаати йўлида садоқат билан хизмат қилишга ваъда берамиз. 

Тадбирда таниқли санъаткорлар ва ижрочи ёшларнинг концерти намойиш этилди.