2017 йилнинг 8 май куни Ўзбекистон Республикаси Ташқи ишлар вазири Абдулазиз Камилов мамлакатимизга ташриф буюрган Европада хавфсизлик ва ҳамкорлик ташкилоти Парламент ассамблеяси Раиси Кристин Муттонен бошчилигидаги делегацияси билан учрашди.

Мулоқот давомида Ўзбекистон ва ЕХҲТ ўртасидаги ҳамкорликни ривожлантириш истиқболлари муҳокама қилинди.

Вазир таъкидлаганидек, ЕХҲТ Парламент ассамблеяси делегациясининг ташрифи мамлакатимизга ва Ўзбекистон Президенти Шавкат Мирзиёев ташаббуси билан амалга оширилаётган барча соҳалардаги кенг кўламли ўзгаришларга катта қизиқиш мавжудлигини тасдиқлайди.

Учрашувда 7 февралда қабул қилинган 2017-2021-йилларда Ўзбекистонни ривожлантиришнинг бешта устувор йўналиши бўйича Ҳаракатлар стратегиясини амалга ошириш нуқтаи назаридан инсон ҳуқуқлари, эркинликлари ва манфаатларини ҳимоя қилиш соҳасидаги ҳамкорлик масалалари юзасидан фикр алмашилди.

Суҳбат давомида халқаро ва минтақавий масалаларга алоҳида эътибор қаратилди.

Музокараларда ЕХҲТнинг Ўзбекистондаги лойиҳалари Координатори Жон МакГрегор иштирок этди.

Анвар Илясов олган сурат

Манба: Ўзбекистон Республикаси Ташқи ишлар вазирлиги