Мусобақа ғолиб ва совриндорларини тақдирлашга бағишланган тантанали тадбирда Ўзбекистон касаба уюшмалари федерацияси кенгаши раиси ўринбосари Б.Маҳмадалиев ва бошқалар мамлакатимизда аҳолининг саломатлигини мустаҳкамлаш, айниқса, ёш авлодни ҳар томонлама соғлом ва баркамол инсонлар қилиб тарбиялашнинг муҳим омили сифатида жисмоний тарбия ва спорт ривожига давлат сиёсатининг устувор йўналишларидан бири сифатида эътибор қаратилаётганини алоҳида таъкидлади. Бу жараёнда турли мусобақалар, оммавий спорт тадбирлари ёшларнинг спортга қизиқишини янада оширишда муҳим омил бўлиб хизмат қилмоқда. 

– Жисмонан ва руҳан соғлом бўлиб юришда спортнинг аҳамияти беқиёс, – дейди Ўзбекистон Республикаси Фанлар академияси илмий ходими Абдурашид Мелибоев. – Бу каби мусобақалар турли соҳа ходимларининг фаоллигини ва меҳнат фаолиятининг унумдорлигини оширишга хизмат қилади. 

– Бундай тадбирлар жамиятда соғлом муҳит барқарор бўлиши, ёшларнинг турли салбий иллатлардан мустаҳкам иммунитет ҳосил қилишига катта замин яратади, – дейди Ўзбекистон давлат жисмоний тарбия институти талабаси Кумуш Матёқубова. – Бугунги тадбирда ғалаба қозонганимдан хурсандман. Бу тадбир нафақат ўз маҳоратимни намойиш этиш, балки, турли олий таълим муассасаларида таҳсил олаётган тенгдошларим орасида янги дўстлар топиш имконини ҳам берди. 

Мусобақа ғолиб ва совриндорлари ташкилотчилар томонидан муносиб тақдирланди. Тадбир қатнашчилари "Энг ёши улуғ иштирокчи", "Энг ёш иштирокчи", "Ғалабага бўлган интилиши учун" сингари турли номинациялар бўйича ҳам рағбатлантирилди.