Тошкент шаҳридаги Инҳа университети ва Беларусь Республикаси Юқори технологиялар паркининг таълим маркази Англашув меморандумини имзолади.

Тошкент шаҳридаги Инҳа университети ахборот хизматининг маълум қилишича, Беларусь Республикаси пойтахти Минск шаҳрида шу муносабат билан тантанали маросим ўтказилган. Унда Ўзбекистон Республикаси Ахборот технологиялари ва коммуникацияларини ривожлантириш вазирлиги, Тошкент шаҳридаги Инҳа университети ва Беларусь Республикаси Юқори технологиялар паркининг таълим маркази вакиллари иштирок этган. 

Ҳамкорликдан кўзланган мақсад ҳар икки мамлакат манфаатлари инобатга олинган ҳолда таълим соҳасидаги амалий муносабатларни кенгайтиришдан иборат. Меморандум доирасида томонлар ахборот технологиялари мутахассисларини тайёрлаш ва қайта тайёрлаш ҳамда уларнинг малакасини ошириш тизимини такомиллаштириш бўйича тажриба алмашади. 

Ўқув юртлари ўртасидаги ҳамкорлик Ўзбекистон Республикаси ва Беларусь Республикасида дастурий таъминот ҳамда ахборот технологияларини ишлаб чиқаришни ривожлантиришга кўмаклашиш имконини беради. 

Манба: ЎзА