Ko'rinish
Shrift o'lchami
?
Ekran suxandoni
Ishlab chiqilgan: 
O`zbekiston Respublikasi
Hukumat portali
Ahil-inoqligimiz, totuvligimiz abadiy bo‘lsin
2016-12-04 | Saylov
Bosh qomusimizning 8-moddasida O‘zbekiston xalqini, millatidan qat’i nazar, O‘zbekiston Respublikasining fuqarolari tashkil etishi qayd etilgan.
Ko‘pmillatli xalqimizning siyosiy ongi, huquqiy madaniyati yuksakligi O‘zbekiston Respublikasi Prezidenti saylovida ham yaqqol namoyon bo‘lmoqda. Saylovda mamlakatimizda yashayotgan barcha millat va elat vakillari faol qatnashmoqda.
– Mamlakatimizda turli millat vakillari ahil-inoq istiqomat qilayotganligini hamjihatlikda, faollikda va birdamlikda o‘tayotgan har bir marosim va siyosiy tadbirda yaqqol ko‘rish mumkin, – deydi Respublika Baynalmilal madaniyat markazi direktori N.Muhammadiyev. – Hozirgi kunda mamlakatimizda 137 milliy madaniyat markazi samarali faoliyat ko‘rsatmoqda. Bu Birinchi Prezidentimiz Islom Karimov rahnamoligida mamlakatimizda amalga oshirilgan bag‘rikenglik, insoniylik, mehr-oqibat g‘oyalarini shakllantirish davlat siyosatining ustuvor yo‘nalishlaridan etib belgilanganligining samarasidir.
Poytaxtimizning Yashnobod tumanidagi Tuzel mahallasi ko‘pmillatli maskanlardan biri. Bu yerda tashkil etilgan 408-saylov uchastkasida saylov uyushqoqlik bilan o‘tmoqda.
– O‘zbekiston Respublikasi Prezidenti saylovida qatnashib, fuqarolik burchimni bajardim, – deydi koreys millati vakili Zoya Kim. – Biz keksa avlod vakillari davlatimizning g‘amxo‘rligini har doim his etib turamiz. Ko‘pmillatli xalqimiz katta oilada yashamoqda. Totuvligimiz bardavom bo‘laversin.
Mamlakatimizda saylovga tayyorgarlik jarayonida turli millat vakillarining saylovoldi tashviqoti materiallari bilan tanishishiga alohida e’tibor berildi. O‘zbekiston Respublikasi Prezidentligiga nomzodlar tojik tilidagi "Ovozi tojik", "Ovozi Samarqand", qozoq tilidagi "Nurli jol" gazetalari nashr maydonidan bepul va teng foydalandi. Umuman olganda, saylov jarayoni haqidagi axborotlar mamlakatimizdagi ommaviy axborot vositalarida 17 tilda chop etilmoqda.
– Mehr-oqibatlilik, samimiylik, mardlik, oliyjanoblik singari fazilatlarga ega o‘zbek xalqi bilan hamnafas, birdamlikda yashayotganimizdan faxrlanaman, – deydi turk millati vakili Musanif Fazliyev. – O‘zbekistonimizda barchaga birdek yaratilgan qulay sharoitlardan mamnunmiz. Umumiy uyimiz bo‘lgan O‘zbekistonda farovon hayot kechirib, yoshlarimizning qalbida Vatanga muhabbat, bag‘rikenglik, shukronalik, bunyodkorlik g‘oyalarini shakllantirishga o‘z hissamizni qo‘shmoqdamiz. Saylovda ana shu ezgu niyatlar ijobati bardavom bo‘lishi uchun ovoz berdik.
