O'zbekiston Respublikasi Bosh vazirining o'rinbosari – investitsiyalar va tashqi savdo vaziri Jamshid Xodjayev AQShning O'zbekistondagi Favqulodda va Muxtor elchisi Daniyel Rozenblum bilan uchrashuv o'tkazdi.

Muzokaralar davomida O'zbekiston-Amerika ko'p qirrali hamkorligi kun tartibining dolzarb masalalari muhokama qilindi. O'zaro qiziqish va ko'p tomonlama aloqalarni o'rnatishga intilish tufayli ikki tomonlama va mintaqaviy sheriklik yo'nalishida erishilgan yutuqlar mamnuniyat bilan qayd etildi.

Muzokaralar davomida tomonlar savdo-iqtisodiy sohadagi hamkorlikni chuqurlashtirish istiqbollarini har tomonlama ko'rib chiqdilar. Xususan, 2022 yilning birinchi yarimida o'zaro tovar aylanmasining 31 foizga o'sgani va bu ko'rsatkich 247,5 million dollarga yetgani qayd etildi. Savdo munosabatlarini jadallashtirish hamda import-eksport operatsiyalari nomenklaturasini kengaytirish bo'yicha aniq tadbirlar belgilandi.

Muloqot davomida investitsiyaviy hamkorlik va sanoat kooperatsiyasini rivojlantirish imkoniyatlariga to'xtalib o'tildi. So'nggi bir necha yil ichida O'zbekistonda Amerika kapitali asosida tashkil topgan korxonalar soni ikki baravar ko'payib, 315 tani tashkil etdi. O'zbekistonda Amerika kompaniyalarining iqtisodiy ishtirokini kengaytirishga o'zaro qiziqish bildirildi. Buning uchun tomonlar AQShning yetakchi kompaniyalari va moliyaviy tashkilotlarini mamlakat hududida qo'shma loyihalarni amalga oshirishga jalb qilish uchun imkoniyatlarni birlashtirishni rejalashtirdilar.

Uchrashuv davomida ikki tomonlama munosabatlarning o'zaro manfaatli boshqa masalalar ham ko'rib chiqildi. Masalan, "yashil" energetika, qishloq xo'jaligi va yoshlar tadbirkorligini rivojlantirish doirasida AQSh Xalqaro taraqqiyot agentligi (USAID) bilan hamkorlikni davom ettirish, shuningdek, istiqbolli sohalarda turli loyihalarni amalga oshirishda AQSh Xalqaro taraqqiyot moliya korporatsiyasi (DFC) bilan hamkorlikni faollashtirishga kelishib olindi.

Bundan tashqari, tomonlar yillar davomida ikki mamlakat ishbilarmon doiralari va mintaqalari o'rtasida yo'lga qo'yilgan mazmunli va samarali muloqotni davom ettirishga kelishib oldilar.

Daniyel Rozenblum AQShning Jahon savdo tashkilotiga a'zo bo'lishi jarayonida O'zbekistonni qo'llab-quvvatlashni davom ettirishga sodiqligini bildirdi.

Uchrashuv yakunida erishilgan kelishuvlar va muhokama qilingan tashabbuslarni samarali amalga oshirish orqali O'zbekiston va AQShning ko'p qirrali hamkorligiga yangi turtki berish mumkinligiga ishonch bildirildi.

Manba: O‘zbekiston Respublikasi investitsiyalar, sanoat va savdo vazirligi