Davlat ekologiya qo‘mitasida tegishli vazirlik va idoralar vakillari ishtirokida tuzilgan Idoralararo ishchi guruhning dastlabki yig‘ilishi o‘tkazildi.

Ushbu yig‘ilish O‘zbekiston Respublikasi Oliy Majlisi Senatining daryolar o‘zanlarini tozalash va qirg‘oqlarni mustahkamlash, noruda foydali  qazilmalarni qazib olishning atrof-muhit, suv va yo‘l xo‘jaligi ob'ektlariga ta'siri yuzasidan 2022-yil 8-iyuldagi SQ-570-IV-son qarori bilan kiritilgan Parlament so‘roviga javoban tegishli chora-tadbirlarni amalga oshirish va unda ko‘tarilgan masalalar bo‘yicha Senat a'zolariga asoslantirilgan tushuntirishlar berish haqida Vazirlar Mahkamasining tegishli topshirig‘i ijrosi doirasida tashkil etildi. 

Yig‘ilishda Favqulodda vaziyatlar vazirligi, Davlat geologiya qo‘mitasi, Sanoat xavfsizligi davlat qo‘mitasi, Ichki ishlar vazirligi,  Davlat soliq qo‘mitasi, Transport vazirligi, Avtomobil' yo‘llari qo‘mitasi, Kadastr agentligi vakillari ishtirok etib, daryolar o‘zanlarini tozalash va qirg‘oqlarni mustahkamlash, noruda foydali  qazilmalarni qazib olishning atrof-muhit, suv va yo‘l xo‘jaligi ob'ektlariga ta'sirining oldini olishga qaratilgan chora-tadbirlar ishlab chiqish masalalari muhokama qilindi.

Bunda, eng ko‘p qazish ishlari olib borilayotgan va tabiiy landshaft buzilishi oqibatida ekologik holati yomonlashgan daryolarning muayyan qismlari bo‘yicha qum-shag‘al qazib olishni cheklash va moratoriy joriy qilish hamda shartnoma va ruxsatnomalarni bosqichma-bosqich bekor qilish bo‘yicha Davlat ekologiya qo‘mitasining Suv yer resurslari va yer osti boyliklarini muhofaza qilish boshqarmasining tashabbusi ko‘pchilik tomonidan ma'qullandi.

Manba: O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi