Pekinda XXIV qishki Olimpiya o‘yinlari yakunlandi. Murakkab epidemiologik vaziyat bo‘lishiga qaramay, Xitoy hukumati ushbu musobaqani yuqori saviyada tashkil qilishga muvaffaq bo‘ldi.

Tashkiliy qo‘mita mehmonlarning salomatligini maksimal darajada nazorat qildi va o‘z oldiga qo‘ygan maqsadga to‘laligicha erisha oldi. Musobaqaga tashrif buyurgan mehmonlar bir necha kun davomida Xitoy xalqining mehmondo‘stligi, mamlakatning zamonaviy sport inshootlari va eng toza ekologik qishki Olimpiadaga guvoh bo‘lishdi.

Bugun “Qush uyasi” stadionida bo‘lib o‘tgan tantanali yopilish marosimi ham ajoyib sahnalashtirilgan badiiy chiqishlarga boy bo‘ldi. Marosimda so‘zga chiqqan XOQ prezidenti Tomas Bax ham ushbu O‘yinlar insoniyat tarixidagi eng yorqin Olimpiadalardan biri bo‘lib qolishini ta’kidladi.

An’anaga muvofiq, marosimda XOQ bayrog‘i kelgusi qishki Olimpiada mezboni Italiya davlatiga tantanali ravishda topshirildi.

Manba: O‘zbekiston Milliy Olimpiya qo‘mitasi