Investitsiyalar va tashqi savdo vazirligi rahbariyati, ITSV huzuridagi Xalqaro hamkorlik va rivojlanish agentligi va O‘zbekistonning bir qator tijorat banklari rahbarlari ishtirok etgan ushbu muzokaralar chog‘ida hamkorlikning bugungi holati, qo‘shma loyihalar amalga oshirilishi hamda sheriklikni rivojlantirishning istiqbolli sohalari muhokama qilindi.

 

 

Yu.Rigterink O‘zbekistonda izchil amalga oshirilayotgan keng ko‘lamli islohotlarning ijobiy natijalariga yuqori baho berdi, shuningdek, YeTTBning investitsiyalarni kiritish va texnik yordam ko‘rsatish orqali mamlakatdagi iqtisodiy o‘zgarish jarayonlarini faol qo‘llab-quvvatlashga tayyorligiga ishontirdi.

 

Tomonlar qo‘shma loyihalarni amalga oshirish bo‘yicha hamkorlikning borishini batafsil muhokama qildilar. Jumladan, hozirgi vaqtda O‘zbekistonda energetika, infratuzilma va uy-joy qurilishi kabi sohalarda YeTTB bilan birgalikda 1,8 mlrd. dollarlik 21 ta loyiha amalga oshirilayotganligi va ishlab chiqilayotganligi aytib o‘tildi. Tomonlar uy-joy – kommunal xo‘jaligi, ekologiya, infratuzilmani rivojlantirish va xususiy sektor sohalarida yangi loyihalarni ishlab chiqishni tezlashtirishga kelishib oldilar.

 

Bank sohasidagi hamkorlik masalalari muhokama qilindi. YeTTB O‘zbekistonda moliya sektorini rivojlantirishda va davlat banklarini isloh qilish va xususiylashtirishda tahliliy – texnik yordam ko‘rsatishda davom etadi.

 

O‘zbekistonda kichik va o‘rta biznes loyihalarini moliyalashtirish uchun YeTTBning kredit-savdo liniyalarini kengaytirish imkoniyatlari ko‘rib chiqildi. Shu bilan birga, YeTTB xususiy va davlat investitsiyalarini birga qo‘shib, infratuzilmaviy rivojlanish loyihalari uchun aralash moliyalashtirishning innovasion vositalarini joriy etishda texnik yordam ko‘rsatadi.

 

Muhokama doirasida investitsiyaviy loyihalarni amalga oshirishda xotin-qizlar va yoshlar tadbirkorligi tashabbuslarini qo‘llab-quvvatlash borasida hamkorlikni kuchaytirish bo‘yicha takliflar ham ko‘rib chiqildi.

 

Muzokaralar yakunida tomonlar qo‘shma loyiha va kelishuvlarning o‘z vaqtida va sifatli bajarilishini ta'minlash hamda munosabatlarning yangi yo‘nalishlarini rivojlantirish maqsadida doimiy hamkorlikning tezkor mexanizmini joriy etishga kelishib oldilar.

 

Shuningdek, “Namangan viloyatining Chust, Pop va Namangan tumanlarida suv ta'minotini hamda Chust va Mingbuloq tumanlarida oqova tizimlarini yaxshilash” loyihasini joriy etish uchun 70 mln dollar miqdorida qarz bitimi imzolandi.

 

Mazkur loyihalarning amalga oshirilishi hisobiga Namangan viloyatining Chust, Namangan va Pop tumanlarida istiqomat qilayotgan 170 mingdan ziyod aholi toza ichimlik suvidan doimiy foydalanish imkoniyatiga ega bo‘ladi.

 

Mablag‘lar viloyatdagi yettita qishloq aholi punkti (Chortog‘, Chust, Jo‘masho‘y, Qizil-Rovot, Pop, Toshbuloq va Uyg‘ur)ga xizmat ko‘rsatuvchi suv olish va tarqatish stansiyalari va tarmoqlari, magistral quvurlar va suv tozalash inshootlarini, shuningdek, Chust va Jo‘masho‘y qishloqlarida suv tozalash inshootlari, oqova suv stansiyalari va tarmoqlarini qurish va ta'mirlash uchun sarflanadi.

 

Investitsiyalar qariyb 115 ming yangi foydalanuvchilarga suv ta'minoti tarmoqlariga ulanish imkonini beradi. Yangi infratuzilma tufayli suv yo‘qotishlari yiliga 0,6 mln kubometrga kamayadi.

 

Loyiha aholiga xavfsiz ichimlik suvi yetkazib berish, iste'molchilarining shaxsiy gigienasini yaxshilash va mavjud suv resurslarini boshqarish samaradorligini oshirishga yordam beradigan suv ta'minoti infratuzilmasini modernizasiya qilishni moliyalashtirish orqali qishloq aholisini markazlashgan suv ta'minoti tizimiga ulash bo‘yicha O‘zbekiston milliy dasturini amalga oshirishga xizmat qiladi.

 

Shuningdek, qiymati 20 mln dollarga teng bo‘lgan “Yashil shaharlar” dasturi doirasida “Samarqand shahriga elektr avtobuslarni sotib olish” loyihasini amalga oshirish borasida mandat xati va Hamkorlik to‘g‘risida memorandum imzolandi. Memorandumga ko‘ra, Samarqand shahar YeTTBning “Yashil shaharlar” flagman dasturining 48-hamkor shahriga aylanadi. Dastur infratuzilmani barqaror rivojlantirish va shahar aholisining hayot sifatini yaxshilashga qaratilgan.

 

Ma'lumot uchun: “Yashil shaharlar” dasturi doirasida YeTTB ekologik muammolarni aniqlash, ularni hal etish bo‘yicha amaliy chora-tadbirlarni ishlab chiqish va shahar infratuzilmasini rivojlantirish uchun investitsiyalarni jalb etishga ko‘maklashadi. Dasturda ishtirok etuvchi har bir shahar atrof-muhitni yaxshilash uchun pilot loyihani amalga oshiradi, so‘ngra Bank mutaxassislari ishtirokida joriy ekologik muammolarga qarshi choralar ko‘rish va investitsiyalarni jalb qilish uchun ustuvor yo‘nalishlarni aniqlash, jumladan, uy-joy va kommunal infratuzilmasini yaxshilash, havo sifatini oshirish, yer va suv resurslarining tozaligi va ommabopligini ta'minlash, qattiq va maishiy chiqindilarni utilizasiya qilish, “yashil zonalar” yaratish va atmosferaga chiqarilayotgan chiqindilar hajmini kamaytirish bo‘yicha harakatlar dasturini ishlab chiqadi. “Yashil shaharlar” dasturi doirasida hozirgi vaqtgacha ajratilgan umumiy mablag‘ miqdori 1,5 mlrd yevroni tashkil etadi va unda 30 mamlakatdan 47 shahar ishtirok etadi.