Tadbirda BMT Bosh kotibining o‘rinbosari Vladimir Voronkov, Bosh kotibning maxsus vakili, BMTning Markaziy Osiyo uchun preventiv diplomatiya bo‘yicha Mintaqaviy markazi rahbari Natalya German, Giyohvanlik va jinoyatchilik bo‘yicha mintaqaviy vakolatxona rahbari Ashata Mittal, Markaziy Osiyo mamlakatlarining ekspertlari hamda qator xalqaro tashkilotlar vakillari ishtirok etdi.

Unda diniy ekstremistik va terroristik tashkilotlar faoliyatida adashib ishtirok etgan fuqarolarning o‘z vataniga qaytishi va ularni jamiyatga qo‘shilishi sohasida hamkorlikni kuchaytirish va tajriba almashish masalalari muhokama qilindi.

Tadbirning asosiy ma’ruzachilaridan biri sifatida O‘zbekiston Respublikasi Tashqi ishlar vaziri o‘rinbosari Sherzod Asadov nutq so‘zladi va mamlakatimizning ushbu sohadagi tajribasi bilan o‘rtoqlashdi, xususan, “Mehr” va “Mehr-2” maxsus operatsiyalari doirasida Suriya va Iroqdagi qurolli mojarolar hududidan 200 dan ziyod yurtdoshlarimizni vatanga qaytarish bo‘yicha olib borilgan ishlar to‘g‘risida ishtirokchilarga ma’lumot berdi.

V.Voronkov, N.German, A.Mittal va tadbirning boshqa ishtirokchilari O‘zbekiston Respublikasi Prezidenti Shavkat Mirziyoyev tomonidan BMT Bosh Assambleyasining 75-sessiyasi doirasida bildirilgan 2021-yilda Toshkent shahrida Tashkilotning Global antiterror strategiyasini amalga oshirish bo‘yicha 10 yil oldin qabul qilingan Mintaqaviy qo‘shma reja doirasida erishilgan natijalar va o‘zaro hamkorlik istiqbollariga bag‘ishlangan xalqaro konferensiya tashkil etish to‘g‘risidagi tashabbusni yuqori baholadilar.

Shuningdek, o‘z fuqarolarini xavfli joylardan olib kelish bo‘yicha O‘zbekiston tajribasi ijobiy baholandi. Xususan, olib kelinganlarni tez fursatlarda oilalari bag‘riga va yaqinlari safiga qaytarish, ularni mahalla darajasida integratsiyalash, shuningdek, mahalliy sharoitga moslashtirish va jamiyatga qo‘shilishlari bo‘yicha amalga oshirilgan ishlar qayd etildi.