Sogʻliqni saqlash vazirligi tizimida korrupsiyaning oldini olish va unga qarshi murosasiz munosabatni shakllantirish borasida qanday ishlar amalga oshirilmoqda?

Bu borada Oliy Majlis Qonunchilik palatasi Korrupsiyaga qarshi kurashish va sud-huquq hamda Fuqarolarning sogʻligʻini saqlash masalalari qoʻmitalari aʼzolari ishtirokidagi yigʻilishda sogʻliqni saqlash vaziri Alisher Shodmonovning axboroti eshitilishi kerak edi. Uning oʻrniga vazir oʻrinbosari Bahodir Yusupaliyev ishtirok etib, tizimda korrupsiyaning oldini olish borasida amalga oshirilayotgan ishlar yuzasidan maʼlumot berdi.

Vazir oʻrinbosari mamlakatimizda sogʻliqni saqlash tizimini yana-da takomillashtirish, tibbiy xizmat sifati va samaradorligini oshirish, aholi salomatligini mustahkamlash borasida keng koʻlamli islohotlar amalga oshirilayotgani, soʻnggi uch yilda sohaga oid 170 dan ortiq qonun hujjatlari qabul qilingani, sohani moliyalashtirish hajmi yil sayin ortib borayotganini aytdi.

Taʼkidlanganidek, sohada korrupsiyaga qarshi kurashish boʻyicha uning sodir etilishi sabablari va shart-sharoitlarini bartaraf qilishga qaratilgan chora-tadbirlar ishlab chiqilib, amaliyotga tatbiq etilgan. Vazirlik tizimidagi tibbiyot muassasalarida bemorlar oʻrtasida anonim soʻrov oʻtkazish tartibi yoʻlga qoʻyilgan. Mazkur soʻrov jarayonida aniqlangan holatlar keng muhokama qilinib, tegishli choralar koʻrilmoqda.

Shunga qaramay, soha rivojiga salbiy taʼsir koʻrsatayotgan illatlarning hamon saqlanib qolayotgani aholining tibbiy xizmatga boʻlgan ishonchiga jiddiy putur yetkazmoqda.

Deputatlar fikricha, sogʻliqni saqlash tizimida kadrlarni, ayniqsa, hamshiralarni ishga qabul qilishning shaffof emasligi, dori vositalarini davlat roʻyxatidan oʻtkazishda byurokratiya va sansolarlikning mavjudligi tizimda korrupsiya uchun sharoit yaratmoqda.

Shu bois, sohaga oid normativ-huquqiy hujjatlarni inventarizatsiyadan oʻtkazish, ulardagi korrupsiyaga sharoit yaratib beruvchi normalarni aniqlash va bartaraf etish, ruxsat beruvchi hujjatlarni rasmiylashtirishda ilgʻor axborot texnologiyalarini joriy etish orqali inson omilini qisqartirish yuzasidan takliflar bildirildi. Kadrlarni ishga qabul qilish va joy-joyiga qoʻyish tizimini qayta tanqidiy koʻrib chiqqan holda, bu sohada shaffoflikni taʼminlash, vazirlik va uning tizimida “korrupsiyaga qarshi ichki audit” tizimini doimiy olib borish zarurligi aytildi.