Ko'rinish
A
A
A
Shrift o'lchami
?
Ekran suxandoni
Ishlab chiqilgan: 
O`zbekiston Respublikasi
Hukumat portali
Toshkent xalqaro investisiya forumi yuqori saviyada o‘tadi
2020-01-27 | Siyosat
Prezident Shavkat Mirziyoyev 27-yanvar kuni Toshkent xalqaro investisiya forumini yuqori saviyada tashkil etish masalasi bo‘yicha yig‘ilish o‘tkazdi.
Oxirgi yillarda mamlakatimizda investisiya muhiti yanada yaxshilandi. Bu boradagi qonunchilik yangilanib, investorlar uchun huquqiy kafolatlar mustahkamlandi.
O‘tgan Faol investisiyalar va ijtimoiy rivojlanish yilida investisiyalar hajmi sezilarli darajada oshdi. Ayniqsa, to‘g‘ridan-to‘g‘ri xorijiy sarmoyalar 4,2 milliard dollarni tashkil etib, 2018-yilgiga nisbatan 3,1 milliard dollarga yoki 3,7 barobar o‘sdi.
Davlatimiz rahbari kuni kecha Oliy Majlisga yo‘llagan Murojaatnomasida iqtisodiyotni yuqori sur'atlar bilan rivojlantirish uchun faol investisiya siyosati izchil davom ettirilishi, joriy yilda o‘zlashtiriladigan investisiyalarning salmoqli qismi to‘g‘ridan-to‘g‘ri xorijiy sarmoyalar va kreditlar bo‘lishini alohida qayd etdi.
Xususan, 2020-yilda mamlakatimiz iqtisodiyotiga 5,8 milliard dollar to‘g‘ridan-to‘g‘ri xorijiy investisiyalarni jalb qilish belgilangan. Shu maqsadda mart oyida Toshkent xalqaro investisiya forumi o‘tkazilishi rejalashtirilgan.
Forumning asosiy maqsadi iqtisodiyot drayverlari hisoblangan energetika, mashinasozlik, elektrotexnika, axborot texnologiyalari, to‘qimachilik, qishloq ho‘jaligi va oziq-ovqat sanoati, qurilish sohalari hamda hududlarga to‘g‘ridan-to‘g‘ri xorijiy investisiyalarni jalb qilishni kengaytirishdir.
Yig‘ilishda ushbu anjumanni yuqori saviyada tashkil etish uchun aniq tashkiliy vazifalar belgilab berildi.
Xususan, Investisiyalar va tashqi savdo vazirligiga tarmoq va hududlar rahbarlari bilan birga xorijiy investorlarga taklif etiladigan istiqbolli loyihalar bo‘yicha taqdimot materiallari tayyorlash vazifasi qo‘yildi.
Hududiy loyihalarni amalga oshirish uchun mahalliy ishlab chiqaruvchilar va xorijiy investorlar o‘rtasida bevosita hamkorlik o‘rnatishga alohida e'tibor qaratish kerakligi ta'kidlandi.
Tashqi ishlar vazirligiga yetakchi xorijiy kompaniyalar, xalqaro moliya tashkilotlari va ommaviy axborot vositalari vakillarini forumga jalb etish bo‘yicha ko‘rsatmalar berildi.
Anjuman o‘tkaziladigan joylarni yuqori saviyada tayyorlash, uni ommaviy axborot vositalarida keng targ‘ib etish va yoritib borish masalalariga ham to‘xtalib o‘tildi.
Mutasaddilar forumga tayyorgarlik ishlari va erishilishi mo‘ljallanayotgan kelishuvlar haqida hisobot berdi.
