1-iyun kuni Xalqaro bolalarni himoya qilish kuni munosabati bilan Chirchiq oliy tank qo‘mondonlik-muhandislik bilim yurti harbiy xizmatchilari Chirchiq shahrida joylashgan 14-sonli Mehribonlik uyi tarbiyalanvuchilari holidan xabar olib, ularni o‘zgacha usulda bayram bilan muborakbod etishdi.

Qalbi zavqu shavqqa to‘lgan Mehribonlik uyi tarbiyalanuvchilari mehmonlarni xursandchilik kayfiyati bilan kutib olishdi.

Harbiy xizmatchilar Mehribonlik uyiga harbiy texnikalarda kirib borganda bolajonlarning yuzida hayrat va quvonch hissi paydo bo‘ldi. Ko‘ngli yarim bolajonlar harbiy texnika va jangovar qurollar bilan tanishib, o‘z qo‘llari bilan ularni ushlab ko‘rdilar.

Bolalar tomonidan tayyorlangan konsert dasturi mehmonlar ko‘nglida unutilmas iz qoldirgan bo‘lsa, harbiylar tomonidan 108 nafar turli yoshdagi o‘g‘il-qizlarga tarqatilgan kitoblar va turfa sovg‘alar haqiqiy bayram sovg‘asiga aylandi.

Manba: O‘zbekiston Respublikasi Mudofaa vazirligi