Jizzax shahridagi Sharof Rashidov xiyobonida O‘zbekiston yoshlar ittifoqi viloyat Kengashi tashabbusi bilan “Sharaf lentasi”ni ulashish aktsiyasi bo‘lib o‘tdi. Xiyobonga uch mingga yaqin yoshlar vakillari, harbiy xizmatchilar, nuroniylar yig‘ildi. Sharof Rashidovning qizi, akademik Sayyora Rashidova ham ushbu aktsiyada faol ishtirok etdi.

Aktsiyada yoshlar nuroniy otaxonu onaxonlarga “Sharaf lentasi”ni ulashgan bo‘lsa, nuroniylar yoshlarga, yoshlar esa harbiylarga ushbu lentalarni tarqatdi. Xiyobon bo‘ylab davom etgan aktsiya doirasida harbiy orkestrning ota Vatan, tinchlikni madh etuvchi kuy-qo‘shiqlari yangrab turdi.

Eslatib o‘tamiz, O‘zbekiston Respublikasi Prezidentining 2019 yil 23 apreldagi “Xotira va qadrlash kuniga tayyorgarlik ko‘rish va uni o‘tkazish chora-tadbirlari to‘g‘risida”gi qaroriga asosan yurtimiz bo‘ylab “Sharaf lentasi”ni ulashish aktsiyasi davom etmoqda.