Kasbiy taʼlim berishga ixtisoslashgan oʻquv-ishlab chiqarish majmualarini dars jarayonida kerakli xom-ashyo materiallari bilan taʼminlash meʼyorlari Adliya vazirligida davlat roʻyxatidan oʻtkazildi. Mazkur meʼyorlar vazirlik va idoralar bilan kelishilgan holda Xalq taʼlimi vazirligi hamda Oliy va oʻrta maxsus taʼlim vazirligi Kasb-hunar taʼlimi markazining qoʻshma qarori bilan tasdiqlandi.

Ushbu qoʻshma qarorda kasbiy taʼlim berishga ixtisoslashgan oʻquv-ishlab chiqarish majmualarida tegishli kasb-hunarni oʻrganish uchun bir oʻquvchiga sarflanadigan xom-ashyo va materiallarning meʼyorlari belgilandi. Mazkur meʼyorlarga koʻra, 10-11-sinf oʻquvchilariga hududning oʻziga xos xususiyatlaridan kelib chiqib oʻrgatilayotgan 38 ta kasblar 541 nomdagi xom-ashyo va materiallar bilan taʼminlanishi koʻzda tutilmoqda.

Joriy yilda respublika boʻyicha 12 mlrd.soʻm mablagʻning 9,9 mlrd.soʻmi kasb-hunar kollejlari bazasida tashkil etilgan oʻquv-ishlab chiqarish majmualariga, 2,1 mlrd.soʻmi esa umumtaʼlim maktablari bazasida tashkil etilgan oʻquv-ishlab chiqarish majmualariga ajratiladi.

Maʼlumot uchun:

• 2018-2019 oʻquv yilida jami 737 642 nafar 10-11-sinf oʻquvchilariga kasb-hunar oʻrgatish uchun 1 748 ta oʻquv-ishlab chiqarish majmualari tashkil etildi. Shundan 279 961 nafari 11-sinf, 457 681 nafari 10-sinf oʻquvchilaridir.
• 1059 ta kasb-hunar kollejlari bazasida tashkil etilgan oʻquv ishlab chiqarish majmualariga 8083 ta maktablarning 658 456 nafar oʻquvchilari (89,2 %);
• 689 ta umumtaʼlim maktablari bazasida tashkil etilgan oʻquv-ishlab chiqarish majmualariga biriktirilgan 1399 ta maktablarning 79 641 nafar oʻquvchilari (11,8%) jalb etilgan.
• Hozirgi kunda oʻquv-ishlab chiqarish majmualarida oʻquvchilarga 51 ta kasb oʻrgatilmoqda.