Oʻzbekiston Respublikasi Davlat soliq qoʻmitasi va Toshkent davlat iqtisodiyot universiteti oʻrtasida soliq tizimiga kadrlarni tayyorlash sohasida hamkorlik toʻgʻrisidagi Memorandumga koʻra 2019-yil 17-yanvar kuni Davlat soliq qoʻmitasi huzuridagi “Boʻlajak soliqchilar klubi”ga aʼzo boʻlish istagini bildirgan universitet talabalari bilan davra suhbati tashkil etildi. 

Davra suhbatida Davlat soliq qoʻmitasi Kadrlar bilan ishlash boshqarmasi, Toshkent shahri va Toshkent viloyati davlat soliq boshqarmalarining Kadrlar bilan ishlash boʻlimlari hamda Malaka oshirish markazi xodimlari ishtirok etishdi.

Tadbirda talabalarga “Boʻlajak soliqchilar klubi” faoliyatini tashkil etish, talabalarni aʼzolikka qabul qilish tartibi hamda klub aʼzolarining vazifalari, amalga oshiradigan ishlari, huquq va majburiyatlari haqida batafsil tushunchalar berildi.

Tadbir soʻngida klub ishchi organi vakillari davlat soliq xizmati organlarining masʼul xodimlarini jalb qilgan holda klubga aʼzo boʻlish istagini bildirgan va universitet rahbariyati tomonidan tavsiya etilgan talabalar bilan suhbat oʻtkazishi va suhbat davomida talabalarning soliq sohasidagi bilim darajasi, dunyoqarashi baholanishi, oliy taʼlim muassasasi tomonidan berilgan tavsifnoma asosida talaba oʻrganilib, keyinchalik davlat soliq xizmati organlariga ishga qabul qilish masalasi koʻrib chiqilishiga kelishib olindi.