Mamlakatimizda onalar va bolalar sogʻligʻini har tomonlama mustahkamlash, sogʻlom avlod tugʻilishi va uni tarbiyalash uchun zarur sharoitlarni shakllantirish, homilador ayollar va chaqaloqlarda patologiyani barvaqt aniqlash davlat tizimini yanada rivojlantirish, bolalarda nogironlikni kamaytirish borasida aniq chora-tadbirlar ishlab chiqilgan. 

 

Prezidentimizning 2017 yil 25 dekabrdagi “2018 – 2022 yillar davrida bolalarda tugʻma va irsiy kasalliklarni barvaqt aniqlash Davlat dasturi toʻgʻrisida”gi qarori bu borada muhim dasturilamal boʻlib xizmat qilmoqda. Fargʻona viloyati “Ona va bola skrining“ markazi tomonidan onalik va bolalikni muhofaza qilish, har tomonlama sogʻlom avlodni shakllantirish, tibbiy xizmat sifatini yanada takomillashtirish borasida samarali ishlar amalga oshirilmoqda.

 

– Farzand har tomonlama sogʻlom boʻlib tugʻilishi, ota-ona uchun ham, jamiyat uchun ham faqat quvonch keltirishiga erishishimiz lozim, – deydi markaz rahbari Manzura Salimova. – Buning uchun markazimizda tugʻruqqacha boʻlgan davrda homilada rivojlanish nuqsonini aniqlash va uning oldini olish tadbirlarini oʻtkazish (tugʻruqqacha irsiy kasalliklar skriningi), irsiy va tugʻma kasallik bilan tugʻilganlarga va shunday farzandlari bor oilalarga tibbiy-genetik maslahat berilmoqda. Oʻtgan yilda markazimiz tomonidan 28 ming 580 nafar homilador ayol ikkilamchi skrining tekshiruvlardan oʻtkazilib, 251 nafar homilador ayollarning homilasida tugʻma nuqsonlar rivojlanayotganligi aniqlanib, homilani toʻxtatishga tavsiya berildi.

 

Oʻtgan yil noyabr oyidan boshlab, markaz bolalarda sitogenetik tadqiqotlarni tatbiq etish va oʻtkazish uchun raqamli mikroskop va laboratoriya uskunalari bilan jihozlandi. Bu esa Andijon, Namangan va Fargʻona viloyatlarida xromosoma sindromlariga chalingan bolalarni aniqlashni oshirish va tashxis qoʻyish imkonini berdi.

 

Markazda Fargʻona viloyati shahar va tuman tibbiyot birlashmalarining bosh pediatrlari, bolalar jarrohlari, neonatologlar hamda Andijon va Namangan viloyatlaridan genetik va endokrinolog mutaxassislari ishtirokida seminar oʻtkazildi. Unda sitogenetik tadqiqotlarni olib borish hamda xromosoma sindromlariga chalingan bolalarga tashxis qoʻyish masalalari xususida soʻz yuritildi.