O`zbekiston Respublikasi
Hukumat portali
1000 dan ziyod kitob bepul tarqatildi
2018-09-28 | Madaniyat
“Bolalar kitobi” respublika festivali doirasidagi tadbirlar Andijon viloyati tuman va shaharlarida, taʼlim muassasalari, “Bolalar ijodiyoti” markazlarida yuqori saviyada boʻlib oʻtmoqda.
Viloyat hokimligi, viloyat matbuot va axborot, xalq taʼlimi boshqarmalari, Oʻzbekiston yoshlar ittifoqi viloyat kengashi hamkorligida Zahiriddin Muhammad Bobur nomidagi viloyat axborot-kutubxona markazida tashkil etilgan festivalda yozuvchi-shoirlar, adabiyotshunos olimlar, yoshlar, kitob ixlosmandlari ishtirok etdi.
Tadbirda mamlakatimizda kitob targʻiboti orqali maʼnaviy-maʼrifiy ishlar samaradorligini, shuningdek, aholi, ayniqsa, yoshlarning kitobga qiziqishini oshirish, kitob mahsulotlari chop etish va tarqatish faoliyatini qoʻllab-quvvatlash borasida keng koʻlamli ishlar amalga oshirilayotgani taʼkidlandi.
– Festival doirasida adabiy-badiiy yarmarkalar, kitoblar taqdimoti, mushoiralar, oʻquvchilarning yozuvchi-shoirlar bilan uchrashuvlari, kitob targʻibotiga bagʻishlangan turli tanlovlar va boshqa tadbirlar boʻlib oʻtmoqda, – deydi viloyat matbuot va axborot boshqarmasi boshligʻi A.Sultonov. – Bundan koʻzlangan asosiy maqsad, yosh avlodning kitobga muhabbatini oshirish, maʼnaviyatini yuksaltirish, ularda mutolaa madaniyatini shakllantirishga koʻmaklashishdir.
Andijon viloyati “Kitobsavdo” masʼuliyati cheklangan jamiyati tasarrufidagi savdo tashkilotlari tomonidan tashkil etilgan kitoblar savdo yarmarkasi, Bobur nomidagi viloyat kutubxonasining kitoblar koʻrgazmalari koʻpchilikda katta qiziqish uygʻotdi.
Faxriddin Ubaydullayev, Zuhriddin Umurzoqov (surat), OʻzA