Bugun, yurtimiz musulmonlari ulkan musibatga, og‘ir judolikka uchradi. Ko‘p yillardan beri nafaqat yurtimiz, balki mintaqadagi mamlakatlarga ham sermahsul xizmatlari bilan tanilgan, muhtaram ustoz Anvar qori Tursunov foniy dunyodan boqiy dunyoga rihlat qildilar.

Din ishlari bo‘yicha qo‘mita Anvar qori Tursunovning oila a’zolariga, yaqinlariga chuqur ta’ziya izhor etadi.

Janoza namozi bugun, 13 iyun kuni “Minor” jome masjidida Asr namozidan so‘ng ado etiladi.

Anvar qori Tursunov 1958 yil 21 noyabrda Toshkent shahri Hamza tumanida xizmatchi oilasida tug‘ilgan. 1966-1976 yillarda Hamza tumanidagi 198-umumiy o‘rta ta’lim maktabida tahsil olgan. 1981 yil Toshkent Davlat universitetining filologiya fakultetini, 2001 yil Toshkent islom institutini tamomlagan.

1981-1984 yy.  – “Yoshlik” jurnalida muharrir, 1984-1987 yy. – O‘zbekiston Fanlar Akademiyasi ilmiy xodimi, 1987-1989 yy. – Toshkent shahar, Abdulla Qahhor uy muzeyi ilmiy xodimi, 1989-1994 yy. – O‘zbekiston Yozuvchilar uyushmasi qoshidagi tarjima va adabiy aloqalar markazi Sharq adabiyoti bo‘yicha katta muharriri, 1994-1999 yy. – Toshkent shahar, Yashnobod tumani, “Yangiobod” jome masjidi imom-xatibi, 1999-2015 yy. – Toshkent shahar bosh imom-xatibi hamda Toshkent shahar, Shayxontohur tumani «Xo‘ja Axror Valiy» jome masjidi imom-xatibi, 2015 yildan Toshkent shahar bosh imom-xatibi hamda Toshkent shahar, Yunusobod tumani «Minor» jome masjidi imom-xatibi vazifasida faoliyat yuritib kelgan.

Anvar qori Tursunov 1989-1992 yillarda Qur’oni karimning birinchi tarjimasiga (Shayx Alouddin Mansur tarjimasi) muharrirlik qilgan. Anvar qori Tursunovning Ali ibn Ahmad Naysoburiyning «Asbobun nuzul» («Oyatlarning nozil bo‘lish sabablari») tarjimasi, «Fazilatlar kitobi», «Inson mukarram zot» nomli kitoblari nashr etilgan.