Tunisning Hammamet shahrida taekvondo WTF bo‘yicha o‘tayotgan o‘smirlar o‘rtasidagi jahon chempionatining ikkinchi kungi bahslari yakunlandi.

Unda 51 kilogrammgacha vazn toifasida mamlakatimiz sharafini himoya qilgan Ulug‘bek Rashidov bronza medalni qo‘lga kiritdi.

U chempionatda braziliyalik Gabriel Alves (25:5), malayziyalik Imon Firdavs Nasriddin (25:7), nimchorak finalda gretsiyalik Dikaios Michalakakos (25:13), chorak finalda esa rossiyalik Anatoliy Iarinni (18:8) mag‘lubiyatga uchratib, yarim finalga chiqdi.

Afsuski, final uchun o‘tgan kurashda eronlik Amir Valipurga kichik – 11:17 hisobida imkoniyatni boy berdi va bronza medal bilan taqdirlandi.

Eslatib o‘tamiz, chempionatning birinchi kunida vazni 45 kilogrammgacha bo‘lgan hamyurtimiz Amirbek To‘rayev kumush medalni qo‘lga kiritgan edi.

Javohir Toshxo‘jayev, O‘zA