Qoraqalpog‘istonda joriy yilning mart oyidan boshlab O‘zbekiston Respublikasi Adliya vazirligi tomonidan davlat organlari va tashkilotlardagi yuridik xodimlar malakasini oshirish bo‘yicha sayyor o‘quvlar yo‘lga qo‘yiladi.

Prezidentimizning 2017 yil 19 yanvardagi “Yuridik xizmat faoliyatini tubdan takomillashtirish chora-tadbirlari to‘g‘risida”gi qaroriga muvofiq tashkil etiladigan malaka oshirish o‘quvlarida davlat organlari va tashkilotlarning yuridik xodimlari har 3 yilda kamida bir marotaba malaka oshirishi va mazkur vazirlikda hamda uning hududiy organlarida attestatsiyadan o‘tishi belgilangan.

– Biz qoraqalpog‘istonlik yuristlarning Toshkent shahriga borib o‘qishi, attestatsiyadan o‘tib kelishini tahlil qilib ko‘rdik, – deydi Qoraqalpog‘iston Respublikasi Adliya vazirligi mas’ul xodimi P.Qojametov. – Ketgan vaqti va maoshini hisoblamaganda, tashkilotlar hisobidan ularning har biri uchun o‘rtacha 4 million so‘m atrofida mablag‘ sarflanar ekan. Shundan kelib chiqib, Qoraqalpog‘iston Respublikasi Adliya vazirligi bilan O‘zbekiston Respublikasi Adliya vazirligi huzuridagi Yuristlar malakasini oshirish markazi o‘rtasida shartnoma tuzildi va bundan buyon o‘quvlarni Nukus shahrida tashkillashtirish belgilab olindi.

Ayni paytda sayyor o‘quvni tashkillashtirish bo‘yicha zarur ishlar amalga oshirilmoqda.

Anvar Nasirlayev, O‘zA