Olimpiada dasturi doirasida Seulda Koreya Respublikasi Madaniyat, sport va turizm vazirligi tomonidan sport sohasi mutasaddilari uchun “Jamiyatda sport qadriyatlarini rivojlantirish” mavzuida konferensiya tashkil etildi. Unda dopinglarsiz halol sportga erishish, musobaqalardagi g’irromliklarning oldini olish, sport qadriyatlarini rivojlantirish kabi masalalar haqida so’z bordi.

Konferensiya yakunida O’zbekiston Milliy olimpiya qo’mitasi prezidenti Umid Ahmadjonov Butunjahon antidoping agentligi (WADA) prezidenti Kreyg Ridi bilan uchrashdi. Muloqot chog’ida tomonlar o’rtasida o’zaro do’stona aloqalarni o’rnatish, Olimpiya harakatini yanada rivojlantirish bo’yicha hamkorlik rishtalarini mustahkamlash yuzasidan kelishuvga erishildi.

— O’zbekistonda dopingga qarshi kurash bo’yicha olib borilayotgan ishlar yuksak bahoga loyiq, — dedi WADA prezidenti. — Xususan, Prezident Shavkat Mirziyoyevning shu yil qabul qilgan Milliy antidoping agentligi faoliyatini tashkil etish bo’yicha qarori Butunjahon antidoping agentligining kodeks va standartlarini samarali amalga oshirishga xizmat qiladi. Asosiysi esa mamlakatingizda sport sohasida sog’lom muhitni yaratish, sportchilar orasida halollik va haqqoniylik fazilatlarini yanada kuchaytirishni ta’minlaydi. Meni O’zbekistonga taklif qilganingizdan juda mamnunman va buni bajonidil qabul qilaman. O’ylaymanki, ish taqvimimdan kelib chiqqan holda yaqin oylar ichida yurtingizga tashrif buyuraman.