Zamonaviy qurilma 1 kilovatt elektr energiyasi ishlab chiqarish uchun sarf qiladigan shartli yoqilg‘ining miqdori 223 g/kilovatt soatni tashkil qilsa, amaldagi energiya bloklarda bu ko‘rsatkich salkam ikki baravar ko‘p. Buning natijasida yiliga 350,9 million kubometr tabiiy gaz tejaladi. 

Ushbu noyob loyihani amalga oshirish uchun mamlakatimizda birinchi bor AQSHning “Jeneral elektrik” kompaniyasining bug‘-gaz turbina va generatorlari o‘rnatildi. Bundan tashqari, Belgiya, Italiya, Rossiya kabi davlatlardan zamonaviy uskunalar keltirildi. 

Loyihani ro‘yobga chiqarishda mahalliy korxonalar mahsulotlaridan ham keng foydalanildi. “O‘zkabel”, “O‘zelektroapparat”, “Chirchiq transformator zavodi” kabi korxonalar shular jumlasidan. Bu esa katta miqdorda valyutani tejash va jalb etilgan investitsiyalardan maqsadli foydalanishga zamin yaratdi. 

Ushbu zamonaviy bug‘-gaz qurilmasini ishlatish va boshqarish jarayoni to‘liq avtomatlashtirilgan. 

Bug‘-gaz qurilmasining ishga tushirilishi bilan ko‘plab yosh mutaxassislar bandligi ta’minlandi. Ular xorijda va Navoiy issiqlik elektr stansiyasida malaka oshirgan. 

Prezidentimiz tejamkor texnologiyalardan foydalanish zamon talabi ekani, bu kabi zamonaviy loyihalarni ko‘proq joriy etish zarurligini qayd etdi.