Hurmatli fuqarolar, ma’lumki qish mavsumida havo haroratini keskin pasayib ketishi bilan fuqarolarimiz tomonidan xonadonlarni isitish maqsadida turli xildagi yoqilg‘i mahsulotlari, har xil turdagi isitish va gaz uskunalaridan foydalanishga bo‘lgan ehtiyoj kundan-kunga oshib boradi.

Bu esa o‘z navbatida yong‘in va texnika xavfsizligi qoidalari talablarini buzilishi natijasida xonadonlarda tabiiy gaz va havo aralashmasining chaqnashiga, fuqarolarning is gazlaridan zaharlanib qolish ehtimolini oshishiga olib kelishi mumkin.

Misol uchun: Siz dam olayotgan yoki tunab qolgan xonada yig‘ilgan is gazi miqdori atigi 0,1%ni tashkil etgan taqdirda, unday havodan 30 daqiqa davomida nafas olish insonni o‘limga olib kelishi mumkin.

Kuz-qish mavsumida konservalangan oziq-ovqat mahsulotlari, ayniqsa, uy sharoitida tayyorlangan sabzavotlar konservalarini iste’moli ortishi tabiiy xol.

Lekin, shuni unutmaslik kerakki, uy sharoitida tayyorlangan  konserva mahsuloti tarkibida eng kuchli ovqatdan zaharlanishni keltirib chiqaruvchi botulizm kasalligini qo‘zg‘atuvchisi bo‘lishi ehtimoli juda ham yuqori bo‘lib, zaharlanganlarga qisqa fursat ichida malakali tibbiy yordam ko‘rsatilmaganda, 75-85% holatlarda zaharlanish insonning o‘limiga olib keladi.

Misol uchun: botulizm kasalligini chaqiruvchi botulotoksin kobra iloni zahridan 20 000 barobar kuchli hisoblanadi. Uning atigi 1,0 grami 1,0 mln. kishini zaharlab, o‘ldirishga yetadi.

Joylarda kuz-qish mavsumida yuzaga kelishi mumkin bo‘lgan ana shunday noxush holatlarni oldini olish ishlarining samaradorligini oshirish maqsadida, favqulodda vaziyatlarning oldini olish va oqibatlarini bartaraf etish Hukumat komissiyasining shu yil 14 noyabr kunidagi yig‘ilish bayoni bilan joriy yilning 20 noyabr - 20 dekabr kunlari respublikamizda “Kuz-qish mavsumida sodir bo‘lishi mumkin bo‘lgan favqulodda vaziyatlarning oldini olish oyligi”o‘tkazilmoqda.

Shu munosabat bilan, aziz yurtdoshlar, barchangizni mazkur oylikda faol ishtirok etishingizni xamda o‘zingiz va yaqinlaringizning hayoti va salomatligini asrab qolish uchun quyidagi oddiy qoidalar va tavsiyalarga amal qilishingizni so‘raymiz:

Is gazidan zaharlanmaslik uchun:

isitish mavsumi boshlanishi oldidan pechlar, qozonxonalar, suv isitish kolonkalarining sozligi, mo‘rikonlarining tozaligini tekshirib chiqing;

nosoz, nostandart, qo‘lbola yasalgan isitish va gaz moslamalaridan foydalanishiga aslo yo‘l qo‘ymang;

bolalar va imkoniyati cheklangan kishilarni nazoratsiz qoldirmang;

tabiiy gazdan foydalanishda turli xildagi rezina shlanglar, turli xil gaz so‘rgichlardan foydalanmang;

chet davlatlarda ishlab chiqarilgan isitish moslamalaridan faqat yo‘riqnoma bilan yaxshilab tanishib chiqqandan keyingina foydalaning;

Agar xonaga tabiiy gazning to‘lib qolganligini sezib qolsangiz !

gaz plitalari va isitish pechlarini gaz tarmog‘idan o‘chiring;

darrov eshik va derazalarni ochib, xonani shamollating;

xonada elektr jihozlarini yoqmang, yoniq bo‘lsa o‘chirmang, chunki bu yong‘in yoki gaz va havo aralashmasining chaqnashiga sabab bo‘lishi mumkin;

agar gaz chiqayotgan joyni o‘zingiz aniqlay olmasangiz, 104 raqam orqali shahar va tuman gazlashtirish idoralari avariya ta’mirlash guruhlariga qo‘ng‘iroq qiling.

 Sifatsiz konservalangan mahsulotlardan zaharlanishni oldini olish maqsadida:

uy sharoitida pomidor, bodring, patisson marinadi, baqlajon ikralari kabi konserva mahsulotlarini tayyorlamang;

belgilanmagan joylar, ko‘cha-kuylarda sotilayotgan konserva mahsulotlarini xarid qilmang;

uy sharoitida tayyorlangan konserva mahsulotlarini, ayniqsa pomidor va bodiring marinadlarini iste’mol qilishdan chegaralaning, aks holda konservalangan sabzavotlar mahsulotlari suyuqligining tiniqligi va musaffoligiga, sabzavotlarning ezilib qolmaganligi, qopqog‘ini shishib (bo‘rtib) chiqmaganligiga hamda eskirib qolmaganligiga alohida e’tibor qarating;

agarda o‘zingizda botulizm kasalligi alomatlari (holsizlanish,ko‘ngil aynishi, qayd qilish, og‘iz qurishi, ko‘rishning xiralashishi, buyumlarni ikkita bo‘lib ko‘rinishi, ko‘z qovog‘ining osilishi, ovoz bo‘g‘ilishi)ni sezsangiz, darhol yuqumli kasalliklar shifoxonasiga murojaat qiling.

Aziz fuqarolar yuqoridagi qoidalariga rioya qilish orqali siz so‘zingiz va yaqinlaringiz hayotini, mol-mulkingizni favqulodda vaziyatlardan va noxush holatlardan asrab qolasiz.