Ko'rinish
Shrift o'lchami
?
Ekran suxandoni
Ishlab chiqilgan: 
O`zbekiston Respublikasi
Hukumat portali
O‘zbekiston Respublikasi Prezidenti Tojikiston Respublikasi, Qozog‘iston Respublikasi, Belarus Respublikasi va Turkmaniston Hukumatlari rahbarlarini qabul qildi
2017-11-03 | Siyosat
O‘zbekiston Respublikasi Prezidenti Shavkat Mirziyoyev 2-noyabr kuni MDH Hukumat rahbarlari kengashining navbatdagi majlisida ishtirok etish uchun mamlakatimizga kelgan Tojikiston Respublikasi Bosh vaziri Qohir Rasulzoda, Qozog‘iston Respublikasi Bosh vaziri Bakitjan Sagintayev, Belarus Respublikasi Bosh vaziri Andrey Kobyakov va Turkmaniston Vazirlar Mahkamasi Raisi o‘rinbosari Esenmurat Orazgeldiyev bilan ikki tomonlama uchrashuvlar o‘tkazdi.
Tojikiston Respublikasi Bosh vaziri Qohir Rasulzoda bilan uchrashuvda konstruktiv va samarali hamkorlikni rivojlantirishdan ikki tomon ham manfaatdor ekani haqida so‘z yuritildi.
Qozog‘iston Bosh vaziri Bakitjan Sagintayev bilan uchrashuvda oliy darajadagi o‘zaro tashriflar chog‘ida erishilgan kelishuvlar va imzolangan hujjatlarni izchil amalga oshirish masalalari ko‘rib chiqildi.
Belarus Bosh vaziri Andrey Kobyakov bilan uchrashuvda O‘zbekiston – Belarus munosabatlari rivojidagi ijobiy sur’at mamnuniyat bilan qayd etildi.
Tomonlar hamkorlikning mavjud salmoqli salohiyatini, avvalambor, iqtisodiyotning real sektoridagi kooperatsiya imkoniyatlarini to‘la ishga solishdan manfaatdor ekani qayd etildi.
Turkmaniston Vazirlar Mahkamasi Raisi o‘rinbosari Esenmurat Orazgeldiyev bilan uchrashuv chog‘ida Turkmanistonga oliy darajadagi tashriflar va davlat rahbarlarining muntazam muloqotlari O‘zbekiston – Turkmaniston munosabatlarini strategik sheriklik bosqichiga ko‘targani ta’kidlandi.
Tojikiston, Qozog‘iston, Belarus va Turkmaniston hukumatlari rahbarlari O‘zbekiston Prezidenti Shavkat Mirziyoyevga samimiy qabul uchun minnatdorlik bildirdi va o‘z davlatlari rahbarlarining ezgu tilaklarini yetkazdi.
